വിവാഹ വാഗ്ദാനത്തില്‍ നിന്നും ജാതക പൊരുത്തമില്ലെന്ന് പറഞ്ഞ് പിന്നോട്ടുപോകുന്നത് അംഗീകരിക്കാനാകില്ല ; ബോംബെ ഹൈക്കോടതി
മുംബൈ: വിവാഹ വാഗ്ദാനത്തില്‍ നിന്നും ജാതക പൊരുത്തമില്ലെന്ന് പറഞ്ഞ് പിന്നോട്ടുപോകുന്നത് അംഗീകരിക്കാനാകില്ലെന്ന് ബോംബൈ ഹൈക്കോടതി. വിവാഹ വാഗ്ദാനം നല്‍കി ലൈംഗിക ബന്ധത്തില്‍ ഏര്‍പ്പെട്ട ശേഷം വിവാഹത്തില്‍ നിന്ന് പിന്‍മാറിയ വ്യക്തിക്കെതിരെ ചുമത്തിയ ബലാത്സംഗ കേസ് പിന്‍വലിക്കാനാവില്ലെന്നും കോടതി വ്യക്തമാക്കി. ജസ്റ്റിസ് ഷിന്‍ഡെയാണ് വിധി പുറപ്പെടുവിച്ചത്.
വിവാഹ വാഗ്ദാനം നല്‍കി ലൈംഗികമായി ഉപയോഗിച്ച ശേഷം യുവാവ് വിവാഹത്തില്‍ നിന്ന് പിന്മാറിയെന്നായിരുന്നു യുവതിയുടെ പരാതി. പിന്നാലെ അവിനാശ് മിശ്രയെന്ന 32 വയസുകാരനാണ് തനിക്കെതിരെ ചുമത്തിയ ബലാത്സംഗ കേസ് പിന്‍വലിക്കണമെന്നാവശ്യപ്പെട്ട് കോടതിയെ സമീപിച്ചത്.
എന്നാല്‍ ജാതകം ചേരാത്തതുകൊണ്ടാണ് വിവാഹത്തില്‍ നിന്ന് പിന്മാറിയതെന്നും ഇത് ബലാത്സംഗ കേസോ വഞ്ചനാ കേസോ അല്ലെന്നും വാഗ്ദാന ലംഘനം മാത്രമാണെന്നുമായിരുന്നു യുവാവിന്റെ അഭിഭാഷകന്‍ കോടതിയില്‍ വാദിച്ചത്. ഇത് കോടതി തള്ളുകയായിരുന്നു.
2012 മുതല്‍ ഒരുമിച്ച് ജോലി ചെയ്യുന്നവരായിരുന്നു പരാതിക്കാരിയും അവിനാശ് മിശ്രയും. വിവാഹ വാഗ്ദാനം നല്‍കി ശാരീരിക ബന്ധത്തില്‍ ഏര്‍പ്പെട്ടിരുന്നതായും പരാതിക്കാരി ചൂണ്ടിക്കാട്ടിയിരുന്നു.തന്റെ ഗര്‍ഭം അലസിപ്പിക്കാന്‍ യുവാവ് നിര്‍ബന്ധിച്ചിരുന്നതായും യുവതി പരാതിയില്‍ പറയുന്നുണ്ട്.
Read More
കോടതിക്ക് പുറത്തുള്ള വിവാഹ മോചനത്തിനും മുസ്ലിം സ്ത്രീക്ക് അവകാശം ഉണ്ട്; വിധിപ്രസ്താവവുമായി ഹൈക്കോടതി
പീഡനക്കേസ് ഇരയായ യുവതിയെ പ്രതിയായ പോലീസുകാരൻ വിവാഹം ചെയ്തു
‘ലൈംഗികാതിക്രമം ചെറുത്തില്ലെങ്കില്‍ മുന്‍കൂര്‍ സമ്മതത്തിന് തുല്യം’; മദ്രാസ് ഹൈക്കോടതി
വിവാഹ വാഗ്ദാനം നൽകി പീഡനം; ടിക് ടോക് താരം ഷാനവാസ് അറസ്റ്റിൽ