പ്രതികൂലമായ സാഹചര്യത്തിലും കളിയുടെ ഗതി മാറ്റാന്‍ കഴിവുള്ള താരമാണ് രവീന്ദ്ര ജഡേജയെന്ന് സുരേഷ് റെയ്‌ന
പ്രതികൂലമായ സാഹചര്യത്തിലും കളിയുടെ ഗതി മാറ്റാന്‍ കഴിവുള്ള താരമാണ് രവീന്ദ്ര ജഡേജയെന്ന് സുരേഷ് റെയ്‌ന. ഏതൊരു ക്യാപ്റ്റനും ജഡേജയെ പോലൊരു കളിക്കാരനെ ആഗ്രഹിക്കുമെന്നും ലോകത്തിലെ ഏറ്റവും മികച്ച കളിക്കാരന്‍ എന്ന പേരിലേക്ക് എത്താനുള്ള പാതയിലാണ് ജഡേജയെന്നും റെയ്‌ന പറഞ്ഞു.
‘അസാമാന്യ പ്രകടനമാണ് ഈ സീസണില്‍ ജഡേജയില്‍ നിന്ന് വരുന്നത്. ഒരു ഡെലിവറി കൊണ്ടോ, സിക്‌സ് കൊണ്ടോ ത്രോ കൊണ്ടോ കളിയുടെ ഗതി തിരിക്കാന്‍ പ്രാപ്തനായ കളിക്കാരനാണ് ജഡേജ. തനിക്ക് അനുകൂലമായ സാഹചര്യങ്ങള്‍ അല്ലെങ്കില്‍ പോലും പെട്ടെന്ന് കളിയുടെ ഗതി തിരിക്കാന്‍ ജഡേജയ്ക്ക് കഴിയും. അതാണ് ജഡേജ ഇപ്പോള്‍ ചെയ്തുകൊണ്ടിരിക്കുന്നത്.’
‘ഏതൊരു ക്യാപ്റ്റനും ആഗ്രഹിച്ച് പോകുന്ന തരം കളിക്കാരനാണ് ജഡേജ. ക്രിക്കറ്റിന്റെ മൂന്ന് ഫോര്‍മാറ്റിലും മൂന്ന് മേഖലകളിലും ജഡേജ തിളങ്ങുന്നു. ഇതിന് സാധിക്കുന്ന അപൂര്‍വം ചില കളിക്കാരില്‍ ഒരാളാണ് ജഡേജ. വളരെ ആസ്വദിച്ചാണ് ജഡേജ ഫീല്‍ഡ് ചെയ്യുന്നത്. ഫീല്‍ഡ് ചെയ്യുമ്പോഴുള്ള ജഡേജയുടെ സമീപനം എനിക്കേറെ ഇഷ്ടമാണ്’ റെയ്‌ന പറഞ്ഞു
